Aatm-Saakshaatkaar kub hotaa hai?

27Feb2010; SURAT HOLI Satsang-part -2

***************************************************************

PARAM PUJYA SANT SHRI ASARAM BAPUJI KI AMRUTWANI

***************************************************************

(please read part-1 )

..mere gurudev aisi unchaayi pe the ki mai shabdo me nahi bol sakataa hun, mere gurudev ki unchaayi..shabdo me bolungaa to mai mere gurudev ki unchaayi ke saath,gurudev ke saath badaa anyaay kar lungaa..isliye mai kabhi gurudev ke vishay me bol nahi paataa hun..bolataa hi nahi hun..aisi unchaayi ke dhani the..

mere gurudev (sindhi bhajan) gaate the..

bhaaratnjo bhale kare shaad te aabaad rakh

bhaaratiyon kaa bhalaa karo..shaad aabaad karo..

anaath naa naath prabhu mere kar haaN tu…

hey anaatho ke naath ab tu mere ho…

sabajaa sa taar saai waali saare jug kaa

sab ke sataar ho..sab ko taaranewaale ho..saare jug ke waali ho..

anaatho naa naath prabhu..

leele khe laalanhaar prabhu rakh je sahaan tu..

hey laalan ab eis leele ko…mere gurudev leelaashaah ji the..apane ko leelaa bolate the..sign bhi karat eto  ‘leelaa’

likhate..itana ahi likhate the..likhane me bhi kuchh samay lagataa thaa… ‘leelaa’ – 2 shabd likhane me bhi ek-aadh minute lag jaati thi..aise the raajaao ke raajaa…aise nikhaalas nirdosh..

dinataa ko tyaaganaa apano swarup dekh..

tum to shudhd bramh ho drushy ko prakaashiye..

saare drushy ko prakaash denewaalaa tu hai..

apane agyaan te jagat saare tu hi rachyo..

apane agyaan se jagat saaraa tune hi paidaa kiyaa hai..tum ko pata anahi lekin saare jagat kaa aadhaar tu hai..bramha avishnu mahesh kaa adhishtaan tu hi hai..ye gigadi gigadi(heen-deen) kyaa karataa hai..ye updesh bhi unhi kaa hai..aur ye geet bhi unhi  kaa hai..

leele ke laalanhaar rakh je tu saaN tu..

ye mahaapurush ki mahaanataa hai..un ki vishesh-taa hai..purn a-dwait ke sinhaasan par hote huye bhi poore dwait kaa rasaaswaad le rahe aur liwaa rahe..de rahe aur dilwaa rahe hai..isliye naanak ji kahete hai..

bramhgyaani ki mat kaun bakhaane?

tum apani mati se bramhgyaani ki budhdi kaa bakhaan nahi klar sakate ho..

Ramkrushndev itane tyaagi ki koyi laayaa hai ashrfiyaa bhar ke..bole, baabaa mai aap ko bhent karataa hun…

bole,  ‘nahi chaahiye, nahi chaahiye..’

to vo jabardasti de gayaa..bole sab bramh hai to ye gangaaji bhi bramh hai..ashrafiyaa bhi bramh hai..bramh bramh me raho..ashrfiyaa daal rahe gangaaji me …kaise tyaagi..

dhyaanmagn hote hai ..nirvikalp samaadhi me baithe hai..shaam kaa samay huaa hai..aarati ke ghant-naad aadi huye honge..aur ramkrushn dev jage..to hruday aur jo bhi dusare sewak the aaye..to bole,  ‘kahaa gayaa thaa..bajaar gayaa thaa?kyaa laayaa?baingan? dekhu..kyaa bhaav hai?’

bole, ‘2aane’

12paise ke 2aane banate the..

‘aie murkh ye 2aane me kaise laayaa?ye to 9 paise sher ki chij hai..jaao waapas jaao ..waapas 3 paise le aao nahi to baingan waapas dekar 2 aane lekar aao..’

ashrfiyaa tyaagane me sankoch nahi hotaa..lekin 12paise ki chij 9 paise me laate to samaadhi kaa sukh chhod kar us ko daantaa..aur waapas bhej diye..jhaadu lagaate samay jaraa saa kacharaa rahe gayaa to us ko buri tarah daantaa..kaisaa murkh aadi..sab bramh hai , sab vaasudev hai..us ke siwaay ek rattibhar bhi kuchh aur nahi hai..vo samaadhi kaa sukh aur anubhav bhi hai..aur chhoti chhoti baat me satarkataa bhi hai..ye hi to gyaanwaan ki mahimaa hai..

gyaan maan jahaa eko naahi

koyi pakad, koyi maan, koyi haTH, koyi duraagrah nahi hai..sab sahej me hotaa hai..

pandit ji aaye…prashn kiyaa.raman maharshi ne uttar de diyaa..us ne phir charparaa sawaal puchhaa adhyatmik..mahaapurush ek second me samajh jaate..hum kis bhaav se bol rahe..un kaa chitt itanaa saaph hotaa hai..jaise aap ek second me apanaa cheharaa dekh lete hai aise mahaapurush aap ke chehare se ek second me bhaamp lete hai..

Raman maharshi samajh to rahe the ki ye pandit apani visheshataa dikhaane ke liye sawaal puchh rahaa hai..mere bhakto ke bich mai bhi kuchh vidwaan hun aisi hekadi dikhaa rahaa hai..jabaab de diyaa , phir us ne tisaraa(3rd), chauthaa (4th) aise prashno ki bauchhaar lagaayi..to aisaa dandaa uthaayaa aur pandit ko daante ki pandit bhaage aur raman maharshi dandaa lekar us ke pichhe aise daudate gaye…Paul Binton(suprasidhd lekhak) dekhataa rahe gayaa! soche ki ye raman maharshi itane vrudhd kaise daud rahe aur vo jawaan ko hafaa rahe..aise dur bhaage ki pandit gaayab…. phir aaye apanaa dandaa rakhaa..aur sofaa par baithe…chehare pe roj se bhi vishesh shaanti, aanand aur prasann-taa jhalak rahi thi!

aayaa krodh lekin krodhi nahi huye..aayi shaanti to aane diyaa,aao beti baith tu..aayaa chintan to aane diyaa..aayaa bhaav to aane diyaa..mai bramh hun haTH kar ke pandit baithataa.. ,mai jeev hun haTh kar ke murkh baithataa hai..

gyaani to naa pandit hai naa murkh hai..gyaani to gyaani hai!

ho gayaa naa prashn kaa uttar!

prashn badaa unchaa thaa..lekin uttar bhi baap kaa baap thaa! 🙂 (prashn Guruputr Pujya Shri Naaraayan Saai ji ne puchhaa thaa)

Naraayan hari..Naaraayan hari..

Tasy tulanaa kin jaayate..

us bramhvettaa aatmaraami ki tulanaa kis se karoge?

mai bilkul pakkaa aap ko vishwaaspurvak kahetaa hun..mere guruji ke sankalp me itanaa saamarthy thaa ki gaadi gopaalpuri station se uth chuki thi..aur guruji kahi se aa rahe the bhakt ke saath…bole ye gaadi ..

bole,  ‘saai abhi vo gaadi gopaalpuri station chhodi abhi vo aadipur station jaayegi..’

bole,  ‘to kyu paidal jaaye?gaadi ko bol naa jaraa ruk jaaye..’

‘saai vo gaadi to station chhod chuki hai..’

‘arre tu railway kaa aadami hai jaraa bol naa ruk jaawe.. bol “ruk jaa”

us ne bolaa..aur vo sankalp ne gaadi rok di!

jaldi jaldi chale..gaadi me baithe..bole, arre tu to baith gayaa!tu to railway kaa officer hai, tum ko ticket nahi lagegi..lekin mere liye ticket le aao….

‘saai gaadi ne platform chhod diyaa..’

‘arre chhod diyaa to kyaa hai?ticket to le aa! jaa..’

vo gayaa..gaadi platform chod chuki thi..jaa kar ticket le aayaa..gaadi me baithaa..tub tuk gaadi ruki hi thi..

saai bole,  ‘arre baithaa hai, pahele gaadi chaalu to kar aao..ye lo kar-mandal..chullu bhar ke paani ke 3 baar aachman daale aur bolane ko kahaa, “hal maayi hal!Hal maayi Hal!chal maayi chal!!!”

..vo engine driver idhar khutput kar rahe,udhar lohe se pit rahe..kyaa hai samajh me nahi aa rahaa thaa ki gaadi kyu ruki hai..yahaa 3 paani ke chhate lage aur gaadi chal padi!

aise mere gurudev ko maine ye bhi dekhaa ki jab hum gurudev ke shricharano me rahete the nainitaal se hum ko haridwaar jaanaa thaa..to muraadaabaad hoke gaadi jaati hai..junction pe gaadi badalani hoti hai..to humhaari gaadi thodi late pahunchi aur vo gaadi chalane ko thi..to vo dono  gaadiyaa connected thi..to is gaadi kaa aanaa aur us gaadi kaa jaanaa hotaa thaa..vo gaadi kaa driver intjaar kar rahaa thaa..hum saamaan uthaaye aur us ne whisle maari..to humhaare saai ne  kahaa,  ‘bhaai jaraa rukanaa hum ko aane de..’

to bole,  ‘arre baabaa ye kyaa bailgaadi hai kyaa?tumhaare kahene se gaadi rukati hai kyaa?..’

maine TT ko kahaa ki, ‘aap jaraa gaadi roko…first claas ke passenger hai..’

‘arre baabaa tum ko kyaa hai!.. time ho gayaa hai… bahot late chhute hai’

‘..saab jaraa dayaa karo naa abhi saamaan laa rahe..’ us TT ko haath jode mere gurudev ne ..ab saamaan to aanaa hi thaa, lekin us ko haath jod rahe…mujhe pataa thaa ki ye jaraa saa yun kar de to saahab ki badali kaise ho jaaye aur saahab ki nind haraam ho jaaye…

aise mahaapurush ke aage kaisaa rubaab maar rahaa hai aur vo mahaapurush kaise sukad rahe haath jod ke..

to ye mahaapurusho ki mahimaa hai ..un ko aisaa nahi hotaa ki hum bade hai..

gyaani ke hum guru hai

..jo gyaani hai, jigyaasu hai un ke to hum guru hai..baap ke baap hai!

lekin murakh ke hai hum daas..

us ne uthaayaa dandaa hum ne jode haath..

hujur maaph karo..jaan chhodo! 🙂

aisaa ek mahaatmaa thaa..pahele kaa jamaanaa thaa..khetkhali me log lote lekar shuchaalay jaate the..to koyi bure vyakti ne lagaa diyaa mahaatmaa ko dandaa..mahaatmaa ne dekhaa ki ye bahot krur hai..to mahaatmaa ne haath jod ke kahaa bhul ho gayi..ye ek rupiyaa jurmaanaa le le..tumhaare khet me baithaa to ek rupiyaa jurmaanaa le le!

vo to aisaa taakataa rahaa ki kaisaa darpok mahaatmaa mil gayaa..

to dusare din bhi dekhaa ki mahaatmaa jahaa baithaa wahaa jaake thok diyaa dandaa dhaDaak se..vo mahaatmaa ne phir 1 rupiyaa nikaal ke diyaa..

chele ne kahaa guruji ye kyaa kar rahe..aap itane samarth purush…us ko to sidhaa karanaa chaahiye..aap aise rupiyaa denge to paise chale gaye..dharam ki haani ho rahi hai..

arre bole, tere ko kyaa pataa..dekh le 2-3 rupiyo me kyaa hotaa hai..

to mahaatmaa jahaa thahere the wahaa se vo buraa aadami ko pataa nahi chale lekin chele ko dikhaate ki dekh ab kyaa hotaa hai..

ek din aisaa aayaa ki koyi dusaraa baithaa thaa aur us ne thok diyaa dandaa…to jo baithaa thaa us ne aisaa dandaa uthaayaa aur aisaa thokaa ki vo bure aadami ko 2-4 facture kar daale..aur chalataa banaa..

guru ne kahaa dekh chele bure aadami ko sajaa mil gayi naa..apan bhidate to kitani taklif hoti.. 🙂

ati dusht hai to aap haathaajodi kar ke nikal jaao..sajjan hai to samjhaa ke us ko sudhaaro aur durjan hai to maaphi maang ke chale jaao, prakruti apane aap karati hai..

ek aise hi udand thaa aur saadhu ke kapade paher liye..sabhi us ko baabaaji kahete to hum bhi kahete..ghaatwaale baabaa ji bhi un ko bangaali baabaa bolate..kaalaa thaa, badaa shaitaan thaa…jis kisi se bhid jaataa thaa..to hum aake baithate the..ghaatwaale baabaa ki aur humhaari mitrataa thi to us ko achhaa nahi lagataa thaa..to vo maukaa dhundhataa thaa ..ghaatwaale bhi jaanate the…ek din ghaatwaale baabaa ne kahaa.. ye jis kisi se bhidataa hai, is ko koyi milataa nahi abhi tuk.. bas unho ne itanaa kahaa uar thode hi din me khabar mili ki wo baalu me kahi soyaa thaa..kisi se bhidaa to jis se bhidaa vo log lafange the..us ne aise aise mastak par thokaa ki vo us se hi mar gayaa..laawaaris ho ke vo mar gayaa..pulice ne case kar diyaa..maaranewaale faraar ho gaye the..

to ye ishwar ki lila kaho yaa vyavasthaa kaho..ki karm kaa phal der saber sabhi ko milataa hai.. milataa hai..jarur  milataa hai..

to bole bramhgyaan paayaa huaa mahaapurush kyo ishwar ko maane?

arre bhaai jub jagat dikhataa hai to ishwar ki sattaa ko sweekar karanaa padataa hai..ishwar ke sankalp ko ishwar ki vyavasthaa ko maananaa padataa hai..jab bramh ho to bramh bhi us bramh ki ek spuranaa hi hai…isliye braamhi sthiti praapt ho jaaye to phir shankaa nahi raheti..

bramhvettaa ko aap kisi taraaju me tol nahi sakate..bramhgyaan sunane se, bramhgyaani ki sewaa se kyaa phal hotaa hai, kyaa unchaayi aati hai vo kisi taraaju me aap tol nahi sakate..bramhaaji taraju banaa nahi sakate aisi..aur banaaye to taraaju tut-fut jaayegi…

so jaane jasudev  janaahi

jaanat tum hi, tum hi ho jaayi..

bhagavaan ko vo hi jaan sakataa hai, bhagavaan jis par reejh jaaye..hum to bhagavaan ko varan kar rahe hai lekin bhagavaan jab hum ko varan karenge tab hum bhagavaan kaa saakshaatkaar karenge..

shaadi kub jamati hai?ladaki taiyyaar ho aur ladakaa bhi taiyyaar ho..ladakaa haa bole, ladaki naa bole to shaadi nahi hogi..ladaki haa bole, ladake kaa man nahi maane to bhi shaadi nahi hoti…yahaa to 2 ki sammaati chaahiye..lekin saakshaatkaar me to 3 ki sammati chaahiye..3 aankade badi mushkil se milate hai..

– ek to ishwar humhaare liye taiyyar ho jaaye ki mai is se milu..

-dusaraa guru kaa chitt hum par dravit ho jaaye ki is ko mulaakaat karaau..

-aur tisari humhaari tadap bhi ho..

tino baraabar ek jagah par aaye tab hotaa hai saakshaatkaar!

to ek shishy aate jaate ek baar kuchh din rahaa..jaise taise rahaa aise sant ke paas..jub jaane lagaa to guruji bole, ‘kahaa jaataa hai monu?’

bole,  ‘guruji ab 5 din rahaa hun ab thodaa jaanaa hai..’

to guruji ne sunaayi gaali..

mahaapurush jab gaai dete naa to apane liye to gaali dikhati hai..un ke liye to phalaahaar hai sab..

to guruo kaa saannidhy, bhagavat krupaa aur apanaa utsaah ye 3 chije bani rahe..to saakshaatkaar ho jaataa hai..

aur saakshaatkaar itani unchi chij hai, itani unchi chij hai ki 33 karod devataa ke swaami indr bhi us ke aage babalu ho jaate..

indr dev kahete mujhe khushi chaahiye to apsaraa naache, gandharv gaaye, saaji saaj kaa taal milaaye tab mujhe prasannaataa hoti..lekin bramhgyaani ki to drushti jahaa tuk padati, wahaa logo ko aise hi prasann-taa ho jaati hai!  un ke shok taap dur ho jaate…kaisi mahaanataa hai!

guruji tum tasalli naa do sirf baithe hi raho..

mahephil kaa rang badal jaayegaa..

girataa huaa dil bhi sambhl jaayegaa…

kaam me, bhay me, shok me, tanaav me,chintaa me, tere me mere me sab jagah se dil sambhal jaataa hai..aise mahaapurusho ke darshan ki kaisi mahimaa hai..jab darshan se aisaa hotaa hai to un ke vachan se kitanaa laabh!..un ko apanaa maankar un ke vachan pe laganaa aur un ke anusaar apane jeevan ko dhaalanaa..bas ho gayaa naa!

aajanm karm kotinaam

saare karodo karodo sat-karamo kaa phal mil gayaa..karodo janamo ke shubh karmo kaa phal mil gayaa..

aajanm karm kotinaam

jap,tap , yog, kriyaa

taa sakalaa saphalaa devi

guru santosh matrataa

bramhvettaa ke hruday me humhaare aacharan se humhaare vyavhaar se santosh ho jaaye ki haa ye paatr hai!un ko jach jaaye ki ye paatr hai..aap taiyyar hai, guru ji taiyyar hai to ishwar ko to vo taiyyar karaa lenge kabhi..hum taiyyar bane rahe..

OM SHAANTI.

SADGURUDEV JI BHAGAVAAN KI JAY HO!!!!!

Galatiyonke liye Prabhuji kshamaa kare….

Advertisements
Explore posts in the same categories: Pujya Bapuji

5 Comments on “Aatm-Saakshaatkaar kub hotaa hai?”

  1. nikhil Says:

    hariom;
    this is great a work .

    hariom……….

  2. jitendra banshiwal Says:

    mere gurudev ke amrit vachan (satsan) ke bare me kuch kehna mere bas me nahi…..

  3. Shrikant Pandey Says:

    Thanks for the satsang Amrit


  4. […] koyi pakad, koyi maan, koyi haTH, koyi duraagrah nahi hai..sab sahej me hotaa hai..(for more details..) […]

  5. Rajesh Mishra Says:

    Guru Gyan Ka amrit pila pila ke Bapuji shishyon kaa kalyaan karen…

    Hari Om


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: