Jeevan me Purnataa Laao

31Jan2010 –Part 2 ;Delhi Poonam Satsang

****************************************************************

PARAM PUJYA SANT SHRI ASARAM BAPUJI KI AMRUTWANI

****************************************************************

-agar budhdimaan honaa hai to saankhya shaashtra ko vichaaro,budhdi kaa vikaas hogaa..,

-raag aur dwesh se chhutanaa hai to bhagavaan ki upaasanaa karo..

-agar kul-khaandaan me achhi aatmaa laanaa hai to pitaro kaa shraadh-pujan aadi karo….

-lekin tumhare kaan,naak,aankhe aadi sabhi indriyo ko, gyaan indriyo ko sudrudh rakhnaa ho to panch devo me se kisi ki bhi upasanaa karo..ganapati ji ki,shiv ji ki, bhagavaan vishnu ki yaa un ke kisi bhi avataaro ki,bhagavati ki aur sury naaraayan ki …in me se kisi bhi devataa ki pujaa karo to ye tumhaare indriyo ko sudrudh rakhenge aur -itnaa hi nahi agar aap ko is lok me thik-thaak rahenaa ho aur marane ke baad pashu yoni se bachanaa ho, nich yoni se bachanaa ho tabhi bhi in paanch devo me se kisi dev ko isht maan ke upaasanaa karo…

-itnaa hi nahi, in devo ko agar aap mukti ke liye prarthanaa karoge, ‘humhaaraa jis me bhalaa hai wo hi karo dev’  bologe to jaagrut dev aatmaa-paramaatmaa jin ke hruday me jagaa hai us sant ke dwaar bhej denge!bilkul pakki baat hai !! 🙂

bhakti sab sukhan kar mulaa

mil hi je sant hovayi anukulaa

bhakti sab sukho kaa mul hai, yog bal se saamarthy aataa hai…sone ki lankaa bhi milati hai…lekin sachchaa sukh nahi milataa to lover lovery system se sukh dhundh ke kitanaa thakaa raavan …aakhir  sitaamaayi ke prati aakarshit huaa… jin ko bhitar kaa paramaatm ras nahi milataa isliye aadami vikaari raso me bhaagataa hai.. jin ko bhitar kaa ras mil gayaa vo vikaari raso me bhaagegaa nahi..vikaari raso kaa upyog kar ke sansaar ki prakriyaa chalane degaa…

ghode ki lagaam pakad ke yaatraa karanaa ye bahaaduri kaa kaam hai..lekin ghode ki puchh pakad ke ghasite jaanaa ye bhogi hai…

yogi aur bhogi me kyaa farak hai?

yogi ghode ki lagaam pakadanaa jaanate hai..aur bhogi ghode ki punchh pakad ke ghasite jaa rahe…

to shrikrushn kahete :

santusht satatam yogi l

yat aatmaa drudh nischay ll

yogi satat apane aatm-sukh me santusht rahetaa hai. santusht satatam yogi …yat aatmaa drudh nischay..jo prayatnshil hai..aur drudh nischay kiyaa hai ki mujhe to  sachchaa sukh chaahiye,sachchaa gyaan chaahiye..sachchi trupti chaahiye..sachchaa jeevan chaahiye..ye jo haand-maas kaa sharir kaa jeevan hai vo to kachchaa jeevan hai..

kaam me, krodh me, moh me, ahankaar me, waasanaa me ..is me jo majaa hai wo to bilkul naash karanewaalaa hai..

a-vinaashi sukh chaahiye!

to is a-vinaashi sukh ke liye chaahiye tatv vichaar!

raag-dwesh mitaane ke liye chaahiye ishwar ki upaasanaa …

bhaagy ke kathin ank mitaane ke liye bhagavaan ki bhakti chaahiye.. bhakti aur mantro ke dwaaraa upaasanaa ke liye pratidin ki mantr ki saadhanaa hai…

ishwar ki taraf se saugaat ke din aa gaye..bonus ke din aa gaye jaise somvati amaavasyaa,mangalwaar ki angaarak chaturthi, surygrahan, chandragrahan …ye samajho ishwar ke yahaa se saugaate hai..jaise seth aadami, mahaatmaa bhandaaraa karate aur dhan lutaate apane aukaat ke anusaar aise ishwar apani ishwariy aukaat se lutaane ke liye in dino kaa vardaan de diye hai..ki in dino me karoge to laakho gunaa adhik phaayaadaa hogaa..

….jin kaa swaasthy gudbad hotaa ve log aise din swaasthy mantr kaa jap kar ke sidhd kar le..phir 21 baar jap paani me dekh kar jap kare aur vo paani khud piye athavaa dusaro ko de to phaayadaa hogaa…lekin ye nigure logo ki bas ki baat nahi hai…jin ke paas gurumantr hai unhi ke mantr ki sidhdi hoti hai..! 🙂

kabhi koyi aandhi-tufaan aaye aur chhu ho jaaye aise achaanak koyi vipadaa aaye, jaise kisi ko boss tang kare yaa aur koyi to vo mantr (achaanak vighn baadhaa se paar hone kaa mantr)sidhd kar le.

..to aise punyparv ke pavitr din bhagavaan ne apane vaibhav ko udaarataa se baatane ke din tay kiye hai…un kaa laabh jarur uthaanaa chaahiye.

lobh nahi karanaa jyaadaa,manganaa hai to bhagavaan ki priti maango..bhagavaan ki priti aayi to aap vibhu ho jaayenge vibhu!rahenge shari r me lekin anant bramhaando ko aalingan kar ke bramhvettaa ho jaayenge…

braamhi sthiti praapt kar

kaary rahe naa shesh….

jibh taalu me lagaa do..sahaj swabhaav me chup.gaheri shaanti.

Om Shaanti.

ruchikar jeevan aur vaastavik jeevan ke bhed ko samajh lo. bhole manushya ruchikar paristhiti me sukhi hokar jeevan kho dete hai.. bhagavaan ki maheti krupaa un ke ruchikar jeevan me vighn daal ke samay naa khoye aur vaastavik jeevan ki taraf pahunchaane me madat karati …ruchikar bhog mil jaaye, ruchikar niwaas mil jaaye,log bolate ishwar ki badi krupaa hai..dayaa hai… to kyaa jin ko ye chije nahi un par kyaa bhagavaan naaraaj hai?ishwar un par kopaayman hai?bhagavaan kisi kaa buraa nahi karate…jis kaa jis me bhalaa hai us ko aisaa dete bhagavaan krupaa kar ke… jis ke praarabdh chintan aadi ko lekar dete…

purn jeevan vikaas chaahate to apane jeevan me darshan arthaat vastavik tatv kaa gyaan honaa chaahiye.. har paristhitiyo  me sam rahene kaa, karm ki gati, prakruti ki vyavasthaa aadi kaa taatvik gyaan darshan honaa chaahiye… har paristhiti me dukhsukh me param pad me rahenaa ye hai vigyaan …bhagavaan kahete hai,

gyaanvigyaan truptaatmaa l

param purush kaa saakshi drashtaa kaa gyaan aur us gyaan se har paristhitiyo me sam rahene kaa vigyaan is ko paane waalaa vyakti truptaatmaa ho jaataa hai..jeetaatma a ho jaataa hai..mahaan aatmaa ho jaataa hai..

to apane jeevan me darshan bhi chaahiye aur aihik vigyaan ki suvidhaaye aur vigyaan kaa bal  samajh ke aadhin ho…darshan ke aadhin ho…agar vigyaan aadi chije samajh ke aadhin nahi hai to vo hi vigyaan aur bhautik chije apne ko atrupt karegi aur dusaro ko paraadhin karegi…

aaj vishw me vo hi galati ho rahi hai.. jin ke paas dhan hai, sattaa hai, pad hai  ve atrupt hai aur clubo me jaa rahe..kuchh bhi kar ke saphal hone ke liye game khel kar, yudhd tuk ki dustataa kar ke bhi trupt honaa chaahate..

jis ke paas bhagvat shradhdda nahi aur bhagavat darshan arthaat bhagavat tatv kaa gyaan nahi us ke paas vigyaan ke saadhan bhi us ko trupt nahi kar sakate,purnatv nahi de sakate…apitu shaitaaniyat de denge… jaaliyan waalaa baug me ye shaitaaniyat kaa kaand dekhaa gayaa aise aur bhi kayi jagah hotaa…

darshan shaashr kaa gyaan vyakti ko nishkaam banaataa hai.. drushy jagat ki satyataa kaa pol khol detaa hai..dekhate dekhate sab chhu ho jaayegaa… hiranpur chhu ho gayaa.. lankaa chhu ho gayi…angerjo kaa shaasan chhu ho gayaa…tum kitani bhi gaheri niv dalavaao mahel ki lekin mahel chalaa jayegaa yaa to mahelwaalaa chalaa jaayegaa…putr chalaa jaayegaa yaa to putrwaalaa chalaa jaayegaa…dhan chalaa jaayegaa yaa to dhanwaalaa chalaa jayegaa…ye chalaachali kaa rahasy kaa pol kholane waalaa darshan shaashtr hogaa to drushya jagat ki aasakti me bandhoge nahi, us kaa upyog kar ke tum udaar aatmaa banoge …aur bhagavaan me shradhdaa rakhane se aap rasamay aatmaa banoge.

vigyaan aap ko bal detaa hai, kaary ki shaktiyaa detaa hai.. bhog ki sidhdi aur suvidhaa detaa hai..lekin jiv ki bhukh nahi mitaataa… kitane miliyan-tiliyan aa jaaye ..kitane sundaraa aur sundari aa jaaye..lekin jeev ki bhuk nahi mitati…kitane bhi bhautik saadhano se bhuk nahi mitati , nahi mitati , nahi mitati..

kyo ki jivaatmaa nity hai… us ko anity sukh purnataa ka ehsaas nahi karaayenge ..

duniyaa ke bade bade dhanaadhya 25 saal ke baad koyi paagal paayaa gayaa..koyi jail me paayaa gayaa to koyi parol pe aakar ghar pe aatm-hatyaa kiyaa..to koyi diwaaliyaa ho gayaa.. bhautik-taa kitani bhi mil jaaye,agar us me darshan shaashtr nahi hai to vo bhautik-taa nashwar jeevan kaa naash kar detaa shaashwat se bhatakaati raheti hai…shradhdaa raheet jeevan bhaar  ban jayegaa… bhaar se dabaa huaa a-shradhdaalu vyakti  kitanaa bhi paaye lekin bhaar se dabaa huaa chitt clubo me jaayegaa neer-bhaar hone ko… suraa aur sundari ke paas jaayegaa nir-bhaar hone ko..naa jane kaise kaise aashray letaa ‘par’  ke ..   ‘swa’  me shradhaa bithaati hai,   ‘swa’  me darshan le aataa hai…lekin darshan shaashtr ke a-bhaav me arthaat satsang aur bhagavat upaasanaa me shradhdaa nahi hai to kitani bhi chij-vastu se sajj ho, jeevan ki andar ki paraadhintaa jaayegi nahi…phir paan masaalaa tu sukh de.. sharaab tu sukh de..aise sukh ki bhik maang maang ke naa jaane kitane kitane ashudhd aahaar, ashudhd pey pinaa, ashudhd nashaa karanaa aur ashudhd lalanaao ke saath sambandh jodkar bhi vo paraadhin vyakti  aur bhi apanaa vinaash karataa  jaayegaa…

aihik saadhano ke saath paramaatm shradhdaa jagaanewaalaa satsang mil jaaye, satpurusho kaa saannidhy mil jaaye.. to aap ki mul maang hai nirbhay jeevan hai..nir-bhay jeevan aisaa ki jahaa maut bhi aap ko daraa na sake…maut aayegi to sharir ki aayegi…aur chhutegaa to mithyaa chije chhutegi… saty mujh se chhut nahi sakataa… aur maut mujhe maar nahi sakati..to aap ki maang hai –  ‘mai nir-bhay rahu’..koyi nahi chaahataa   ‘mai bhaybhit rahu’…

lekin nashwar sharir ko ‘mai’ maanegaa, nashwar vastu ko meri maanegaa to naa trupti hogi , naa bhay mitegaa…aap a-trupti bhi nahi chaahate aur bhay bhi nahi chaahate… aap dukh mitaanaa chaahate..lekin dukh mitaane tuk aap rukate nahi, aap param sukh  bhi  chaahate hai…

agar param sukh chaahate to param tatv kaa gyaan, param tatv ki priti aur param tatv me jage huye satpurusho kaa sastang , saanidhya, dikshaa shikshaa se purnata hoti hai….anyathaa naa dhan se purnataa hoti hai, naa clubo se purnataa hoti hai , naa sone ki lankaa se purnataa hoti hai…

naa hitlar ke jeevan me purnataa dekhi gayi, naa raavan ke jeevan me…lekin shabari ke jeevan me purnataa dekhi gayi..rahidaaas ke jeevan me purnataa dekhi , suni gayi..kabir ji ke jeevan me , naanak ji ke jeevan me purnataa dekhi suni gayi..unho ne sahi upaay kiye the….vigyaan ke saadhano kaa upyog kiyaa lekin gyaan kaa ashray lekar… tatvagyaan aur vigyaan ka sam-bal lekar udaarataa laaye the apane jeevan me…udaarataa ke binaa prem ras pragategaa nahi aatm-saundary ubharegaa nahi ..

jis ke jeevan me aatmik saundary nahi hai, vo adhuraa hai…nir-vikaaritaa aaatm saundary hai…. andar kaa sukh milaa to aap ke jeevan me sanyam rahegaa…par-sree to kyaa, apani patni hote huye bhi aap sanyami rahenge…

mai aise kayi militarywaale afasaro ko aur bhi adhikaariyo ko janataa hun , jo dikshaa lene ke baad sharaab nahi pite…jin ko satsang ke dwara antaraatmaa ki trupti mil gayi un kaa anubhav hai ki :

bhaang bhasudi suraa paan utar jaaye prabhaat

naam nashe me nanakaa  chhakaa rahe din-raat

jin ko bhagavat shaanti mil gayi..bhagavat satsang mil gayaa ve sharaab ke gulaam nahi rahete..ve samajhate hai –

jaam pe jaam pine se kyaa phaaydaa?

raat biti ,abhaagi alkohol satyaanaash

kar ke subah ko utar jaayegi…

tu hari naam ki pyaaliya piyaa kar

teri saari jindagi sudhar jaayegi…sudhar jaayegi.. haa!

botal ki sharaab hi sharaab nahi hoti… satta ki bhi sharaab hoti, sattaa kaa bhi nashaa hotaa, koyi bade pad kaa bhi nashaa hotaa hai..budhdimataa kaa bhi nashaa hotaa hai.. lokaanuranjan kaa bhi nashaa hotaa hai…ye saare nashe jeev ko path-bhrasht kar dete, agar shradhaa aur paramaatm tatv kaa gyaan nahi to…

agar shradhdaa  hai, parmaatm  tatv kaa gyaan hai to aap ke hruday kaa saundary chamcham chamkegaa… vikaari raso kaa khulaa kaanun hote huye bhi aap sharaab nahi piyenge..aap juwaa nahi khelenge..aap par-stri gaman nahi karenge..aap par-purush se hehe nahi karenge..kyo ki aap ke antaraatmaa kaa saundary nir-vikaaritaa me hai…

to ye jeevan ki maang hai ki:-

ek to saundary arthaat nir-vikaaritaa

dusari udaarataa

tisari  ishwar ki shradhdaa

chauthaa aihik vigyaan aur

paanchavaa darshan

is se jeevan purn sukhi hotaa hai, aur har paristhiti ke sir par pair rakhakar purnataa ko paa letaa hai…ishwar ko apanaa maanane se priti utpann hoti, shradhdaa kaa ras aataa hai..

darshan shaashtr se pataa chalegaa ki ishwar hi apanaa hai, baaki to bhram hai ki   ‘meraa hai ,meraa hai’…. ishwar ke siwaa aap kaa koyi thaa nahi, hai nahi, ho sakataa nahi.. jo dikhataa vo ishwar ki sattaa se dikhataa… vo bhi jo koyi jee rahaa tumhaaraa priy,vo bhi ishwar ki sattaa se jee rahaa hai..to darshan shaashtr kaa gyaan hai ki vaastavik me  tum ho sat-chit aaand swarup hai.. baaki sab asat jad ki  maayaajaal me jeev ulajhataa hai…

agar aap ishwar se vigyaan maangate ho, aihik chije mangate ho to aap ki shradhdaa bhakti apurn rahe jaati ..jaise bachchaa maa se paise maange,paise mile bachchaa bhaag gayaa..sewak nokari achhi maangataa hai,achhi nokari mili to  bhaag gayaa…koyi putr maangataa hai, putr mil gayaa to bhaag gayaa…lekin guru se guru ke naate priti karegaa to aakhari tuk guru ki prasaadi me purnataa tuk pahunchegaa…lekin guru se  baahar ki chije maangataa hai to mili to bhi bhaag jaayegaa aur nahi mili to bagaavat-khor ho jayegaa ..lekin guru se priti sambandh ho gayaa, ishwar se priti sambandh ho gayaa to koyi bhi paristhiti aaye aap kaa vishwaas , shradhddaa , priti dubegi nahi…

to ye ishwar priti kaise aaye?

aap ishwar ko apanaa maano to priti hogi..

badi bahen shaadi ke baad maayke aayi…chhoti bahen puchhati, mere jijaaji kaise hai?

badi bahen bolati, ‘chal ri pagali! phere phire to apane ho gaye… apane to pyaare hi hote naa… apane jute bhi pyaare hote! 🙂 ye to tere jijaaji hai! kaise puchhati hai…jab apane hai to sab thik hai!  🙂

apanaa betaa naak bahe rahi hai, kapade phate hai, gandagi se lath-path hai to bhi pyaaraa lagataa..jutaa apanaa hai to pyaaraa lagataa,jaraasaa kuttaa pichkaari ki taiyyaari kare to huthut karate… to vaastavik me jo apanaa hai,vo paramaatmaa pyaaraa lagane lag jaaye to paramaatmaa se aap vigyaan ki bhautik chije nahi mangenge ..aap bhikmange nahi banenge..apane aap me trupt rahenge..

hiranykashypu ne tapasyaa kiyaa aur paramaatmaa se vigyaan maangaa..aihik chije maangi…trupti nahi mili..raavan n ebhautik chije managi, trupti nahi mili…lekin  shabri ne gurkrupaa mangi..shabari ki purnataa me kami nahi rahi..aur raavan ki purnataa kabhi huyi nahi..

aap apani akal-hushaari ko bhautik chijo ko paane me lagaayenge to aap raavan ki naayi thage jaayenge…hitlar sizar ki naayi thuge jaayenge..musolin, linkan ki naayi thuge jaayenge..

agar aap me thodi bhi sujhbujh hai to bhagavaan se bhagavaan ki priti maangiye!

bhakti sab saadhan kar mulaa

bhakti sabhi saadhano ki mul hai…

mil hi je sant hovayi anukulaa

sant mil jaaye …bhagavaan ki bhakti mil jaaye to maa ki baap ki , padosi ki sabhi ke liye jo bhi sampark me aate un ki sewaa sadbhaav karenge to antaraatmaa dravibhut honge…

drave jab raghunaathaa tab deve saadhusangati..

antaraatmaa dravit honge to sant ke sharan me jaane ki ruchi hogi…

agar mere khote karam honge, to  sant chaahe mere paas me rahete ho, mai un ke paas nahi jaaungaa…un me dosh dekhungaa, un ke paas aanewaalo ko andhshradhdaalu maanane ki bewkufi karungaaa.. sant par aarop, prati-aarop kar ke apane ko aur apane 7 pidhiyo ki tabaahi ke taraf le jaaungaa…

agar mere koyi achhe karm hai, sachche karm hai to ishwar se mai prasannataa maangugaa..ishwar prasann honge to sant kaa sang milegaa…sant kaa sang milegaa to gurubhaai mujhe apane lagenge..guru apane lagenge…bhagavaan apane lagenge..apanaa aapaa hi mujhe apne swarupo me dikhane lagegaa …meraa param kalyaan ho jaayegaa…

najare badali to nijaare badale…

kishti ne badale rukh to kinaare badale

aap apanaa param mangal chaahate hai to aap apanaa najariyaa shradhdaa darshan saheet banaayiye…matlab gyaan aur shradhdaa sahit apane aap ko susajj kijiye….

gyaan hogaa to vastuo kaa sanyam se upyog karoge..shradhdaa hogi to vastuo kaa  ‘sat’ ke liye upyog karenge…antar ke ras ke liye upyog karoge…

maan lo mere paas rupiye hai..maine hajaaro rupiye kaa ghee mangaayaa,  jau-til mangaaye, shidhda-saamaan mangaaayaa aur maine yagy kiyaa , aanewaale garib-gurabo ko yathaa-shakti  bhojan, chije dilaayi..aanewaale mitro ko bhojan karaayaa…to chije to aadhi-bhautik hai, lekin meraa uddeshy sarv-maangaly hai to maine us se aadhi-daivik aur adhyaatmik phaayadaa uthaayaa!

hai to mere paas paththar kankad lekin maine us ko badalaa kar hire kharid liye!

aadhi-bhautik chij kaa aap ne    ‘sat-upyog’ kar ke aap ne adhyaatmik unnati ki to aap ne kankad dekar hire le liye!!

aur us hiro me bhi apanatv nahi hai to jis kaa saaraa bramhaand hai us ishwar ke saath aap ekaakaar ho jaaoge..!

jeevan me shradhdaa aur darshan, udaarataa aur saundary ho…saundary maanaa nirvikaaritaa aur udaarataa maanaa aap antraatmaa me trupt rahenge …aap ke paas gyaan-vigyaan se trupti rahegi to aap ke paas jo shakti hai, jo yogyataaye hai ,us  kaa thik thik sat-upayog hogaa…

aur aap kabhi ye nahi sochiyegaa ki mere paas khub  dhan hogaa to khub daan-pun karungaa to bhagvaan raaji honge ye vahem me nahi rahenaa….mere paas pad hogaa phir mai sewaa karungaa, certificate aayegaa phir mai sewaa karungaa ye man ke dhoke me aap mat padiyegaa..

aap abhi, is samay jo bhi hai, jaise bhi hai khaali ye 2 sutr sweakaar kariye to aap bhagavat praapti ke adhikaari hai!

1) ek to aap ye pakkaa kariye ki kuchh bankar ,kuchh yogyataa haasil kar ke, kuchh purushaarth kar ke  mai bhagavaan ko paaungaa is vahem ko nikaal dijiye.

2)dusaraa kewal bhagavaan ko apanaa maankar bhagavaan ke naate sabhi se vyavahaar karo…

samajho kisi ke paas 2kaudi bhi nahi hai, nirdhan hai,ek akshar padhaa nahi hai..vo bhi karm -yog kar sakataa hai.

kisi din-dukhiyaare ke dukh me bhaagidaar ho jaaye…  ‘bhaai aap nirdhan hai, dhan to mai nahi de sakataa hun..kuchh  nahi de sakataa hun,lekin mai prarthanaa karataa hun ki bhagavaan aap ko dhan de,aur dhan kaa satupayog karene kaa satsang kaa dhan bhagavaan aap ko de….baahar kaa dhan to milegaa tab milegaa,satsang kaa dhan to mai aap ko abhi dilaa sakataa hun.. phalaani jagah par satsang hai,chaliye mere saath!aur to mere paas saadhan nahi hai , lekin mere paas cycle hai, bike hai ..us pe bithaa ke le jaa sakataa hun…!’

aap ne badi sewaa kar liye..

kisi kaa betaa bimaar hai, pati-patni koyi dukhi hai to kyaa kare?

“..bade bade raajaao ke bete mar jaate yaa pati patni  dukhi hote.. aisaa ye sansaar dukhaalay hai..mai to chaahungaa ki dukhahaari hari aap ka dukh har le..

(hari kaa chintan karo)..hey hari..jo mar gayaa us ki sadgati kare.. bhagavaan tum dukhhaari ho,tum chaityany ho..aise ho.. is prakaar bhagavaan ki priti ki baate sunaa di…to us ke man kaa dukh,us kaa tan kaa dukh,us ke kalpanaa ke dukh aap yathaayogya samay ke anurup us ki sewaa kar ke aap dusare ke dukh me dukhi hovoge to aap ko apanaa dukh chhotaa lagegaa…

aur dukh-haari ki trupti aur shaanti aap ke hruday me jagmagaane lagegi..

koyi sukhi hai,to us ke sukh ko dekh kar irshaa karane se humhaare sharir me pitt badhataa hai..pitt janeet kayi bimaariyaa badhati hai..liver kharaab hotaa…

irshaa hum kabhi naa kare

nindaa naa kare.. saty bole , jhuth tyaage…

khushaamat khori ke shabd chhodkar priy ho, heetkar ho..madhur ho ..aise shabdo se aap dusare ke tan ko swasth aur man ko swasth utsaaheet banaa sakate… aur budhdi ko tatvgyaan ke prasaad se paawan kar sakate hai…

agar vo aap ki baat maane, naa maane…aap  us ke nikat nahi jaa sakate….tabhi bhi bhagavaan ko kahe sakate ki phalaani vyakti bechaaraa is dukh se dukhi hai..is rog se rugn hai..inhe shaanti de..in kaa mangal kare.. to aap ki mangal bhaavanaa us kaa to mangal karegi..lekin us kaa mangal hote hote mangal bhaavanaa se tumhaaraa  mangalmay hruday hone lagegaa..!

jo log kahete hai ki ,

saadhak maange maanganaa ,prabhu dijiye mohe doye

baapu humhaare swasth rahe,aayu lambi hoye

ab tumhaare kahene se baapu swasth rahete,aayu lambi hoti hum sweekaar kar lete..lekin aap kaa hruday bhi to sad-bhaav se paawan hi hotaa hai… aap ko ghaataa kyaa? 🙂

aise hi mai chaahataa mere saadhak swasth rahe, sukhi rahe, sanmaanit rahe…aur saadhako ke sampark me aanewaalo kaa bhi mangal ho…aur desh videsh me vishw maanav kaa bhi mangal ho…

ab sab kaa mangal karane kaa saamarthy,chij vastu nahi hai..aur sab log meri baat maane ye sambhav nahi hai…to bhi sab kaa mangal chaahataa hun to meraa hruday sab mangalamay karanewaale hari ke saath ekaakaar ho jaataa hai…!

…to aap kisi kaa bura chaahenge nahi , kisi kaa buraa sochenge nahi..kisi kaa buraa karenge nahi, kisi ko buraa manenge nahi to aap kaa hruday buraayi raheet ho gayaa… aap ne sansaar se bahot badi sewaa kar di..

kyo ki aap kaa hruday buraayi rahit ho gayaa to bahot ho gayaa!

achhe kaam karane se koyi aadami achhaa ho jaataa is baat me hum nahi phasate…kayi aise dakait bhi achhe kaam kar ke dikhaa denge..kayi aise saleman bhi achhiwaani aur achhaa kaam kar ke dikhaa denge..aur mokaa milegaa to kyaa se kyaa kar lenge..

achhe kaam karane se aadami achhaa nahi hotaa, buraayi chhodane se aadami achhaa hota ahai..

to aap buraayi chhodenge kaise?

ki aap ke andar aihik jagat kaa aakarshan naa rahe, asali aakarshan jag jaaye.. aap ke jeevan me darshan shaashtr aa jaaye..sujh -bujh aa jaaye…ki jis ke liye itanaa kar rahe,vo sab dhokaa hai,sab chhod ke jaanaa hai… humhaaraa utanaa hi hai jitanaa pach jaataa hai!!

leke to koyi gayaa nahi…leke jaayegaa nahi, le kar jaa sakataa nahi to kyo be-imaani kare?kyo kapat kare?kyo us ke liye haay haay kare?

murde ko prabhu det hai kapadaa lattaa aag l

jindaa nar chintaa kare us kaa badaa abhaag ll

2 prakaar ke rog hai…aur 2 prakaar ki davaayiyaa hai..

1)ek hai  aankho kaa rog.. us kaa asiaa , us kaa waisaa..

2) pet kaa rog …aur aur chaahiye me aur khappe aur paaun…aur paaun me khap jaate….

jo sansaar ko sachchaa maanane ki galati kar ke baithe hai un kaa pet kaa rog aur aankho kaa rog kabhi thik nahi hogaa..pet kaa rog arthaat pet bharataa nahi,dhan se, waahwaahi se , degreeyo se pet hi nahi bharataa! padh padh ke khopadi khaali ho jaati hai, netr ki jyoti kshin ho jaati hai.. jawaani me hi chashme baaj ho jaate phir bhi ye padhu ,ye karu…aakhir kar kar ke kahaa jaaoge?bole, badaa aadami banu…arre murkh!raavan se badaa ban sakataa hai kyaa?..aihik chije paakar tu raavan tuk jaa sakataa hai kyaa?

nahi jaa sakataa to un ke pichhe kahe ko mar rahaa hai?

saai te itanaa maangiye

navkoti sukh samaaye l

mai bhi bhukhaa naa rahu

saadhu naa bhukaa jaay ll

baaki kaa samay bachaa kar tu asali chij paane me lag naa!

jis chij ko chhod jaanaa hai…degreeyo ko, vastuo ko, un chijo ke liye haay haay karane se vo chije aayengi nahi..vo to praarabdh ke aadhin hai..

agar apane man chaahi chij aati to koyi aaj abhaav-grast nahi rahetaa..kitani kitani degreeyaa lekar bechaare chhore ghum rahe…nokari nahi milati…aur koyi bhais charaane waale 1laakh 80 hajaar paa rahe…praarabdh hai aur prusharth bhi hai.

to aihik chijo me aap kaa purushaarth, praarabdh, paristhitiyaa, prakruti ki vyavasthaa se aihik chije milati hai..

lekin un ko apani maan maan ke pareshaan hoke  chhod ke maranaa hai..!

ye hi philosophy hai, ye hi sidhdaant hai aur kyaa hai?

kitanaa bhi paa lo, kitanaa bhi apanaa maan lo, aakhir apanaa paayaa, maanaa apane paas rahegaa kub tuk?

ye jagat kaa laali jalaali rahegaa kub tuk?

ye maan aur sanmaan rahegaa kub tuk?

ye lalanaa patiyo ki mithi mithi baate yaa dikhaavati chamak damak rahegi kub tuk?

ye to sab baheti dhaaraa me bahe rahe jaise gangaaji me baalu aur tinake bahe rahe..aise samay ki dhaaraa me yauwan bhi bahe rahaa..sab bahe rahaa hai…

in bahete huye ko  ‘bahetaa’  huaa jaankar, in se mamataa aasakti hataakar rahene waale kaa gyaan paa lo.. rahenewaale me shradhdaa kar lo..

rahenewaale ke naate sat-karm kar lo.. vo aap ko udaar banaayegnge..vo aap ko sundar banaayenge…arthaat nirvikaari banaayenge…

jagat ko sachchaa manoge aur sukhi rahenaa chaahoge to vikaari rahe binaa rahenge nahi…aur vikaar aap ko khokalaa kiye binaa jaayenge nahi..

swaasthy to chalaa jaayegaa lekin waasanaa nahi jaayegi..

dhan to chalaa jaayegaa lekin maang nahi jaayegi..aur dhan padaa rahegaa tab bhi a-bhaav nahi jaayegaa..aur khappe khappe me lage rahenge…

to aap ke jeevan me darshan nitaant jaruri hai.. vigyaan jaruri hai,bhautik vastu jaanane ke liye ,lekin itani jyaadaa jaruri nahi jitanaa darshan , sujh-bujh jaruri hai…

sujh-bujh hone par kopin dhaari bhi param sukhi rahe sakataa hai..

aur sujh-bujh ke a-bhaav me chakravarti samrat bhi kaheraataa huaa raat bitaayegaa,raat ko nind ke sharan nahi jaa sakataa..

laakh karod ke maalik hai,raat ko nind nahi aati..aise logo ko mai jaanataa hun..baal jhad gaye taal ke..sab jagah pratishthaa hai, mediya ke saadhano se susajj hai..kitane mantriyo ke saath meljol hai..kitane bussiness hai …itanaa karane ke baad bhi jeevan se dukhi hai to a-bhaav to nahi gayaa, a-shaanti to nahi gayi…

aap kitanaa saadaa jeete us kaa mahatv nahi hai,aap kitanaa unchaa jite is kaa mahatv nahi hai, is jeevan ki shaam hone ke baad aap ki gati kyaa hogi is kaa mahatv hai..isi kaa naam to darshan hai..

aap ke jeevan me darshan shaastra honaa chaahiye.jeevan kaa darshan honaa chaahiye…darshan hai to shradhdaa bhi hogi..aur shradhdaa hogi to ras aayegaa ..apanatv aayegaa…ras aur apanatv se udaarataa bhi aayegi…

apanaa jeevan purn hogaa aur aap ke sampark me aanewaale bhi rasmay hone lagenge..

ni-ras jeevan koyi nahi chaahataa..aap chaahate kyaa hum  bhaybhit rahe, dukhi rahe? hamhaaraa jeevan ni-ras ho aisaa nahi chaahate…aap to chaahate ki  rasmay jeevan ho… paanmasaalaa bhi khaate to ras ke liye,padosi ke ghar jaa ke gupsup bhi lagaa to ras ke liye , majaa ke liye..daan-pun karate to bhi yahaa aur wahaa sukhi hone ke liye-to sukh-ras chaahate..

to ras-may jeevan chaahiye to apane jeevan me anivaary 5 chije le aao…

1)darshan

2)vigyaan

3)shradhdaa

4)udaarataa

5) saundary

jeevan purn ho jaayegaa..!

phir koyi certificate ki jaruri nahi….in min 3 padhe nahi to bhi chalegaa.. 🙂

laalaji mahaaraaj 3 to kyaa paheli bhi nahi padhe the..pahele hi din paathshaalaa me gaye..bole 1 se 10 likho..bole  ‘1’ likhaa phir 2 kaay ko likhanaa?maaster ne bolaa likho..master ne thok diyaa to laalaji mahaaraaj wohi slate mastarji ko arpan kar ke chal pade…laalaji mahaaraaj mere mitr-sant the..badi unchi kamaayi ke dhani the… kayiyo ki guththiya sulajhaa dete the…meraa un ke prati sneh thaa aur un kaa bhi mere prati khub sneh thaa..

aaj aisaa wahem ghus gayaa hai ki angreji padhaayi ke binaa vikaas nahi …vo angreji padhaayiwaale angrej kitane sukhi hai?kyaa vikaas hai un kaa? ye kaisaa bharam hai?

in ki paramparaa waale abhi bhi humhe gulaam banaaye chale jaa rahe..jo angreji padhe hai aur un ke desh me rahete wo bhaaratwaasi kitane ashaant hai..aur un se bhi jyaadaa angej ashaant hai..adhik se adhik aatmhatyaaye kaun se desho me hoti hai?adhi se adhik gunaah khori kaun se desho me hoti hai? pahele bhi maine sunaayaa hai innocent report.

har 10 second me dakaiti hoti hai.

har 16 second me balaatkaar hotaa hai,dhanaadhy amerikaa me.

prati ek laakh vyaktiyo ke 63 purush aur 9 mahilaaye aatmhatyaa karati hai..jaapaan me 36 purush aur 14 mahilaaye,rashiyaa me 70 purush aur 11 mahilaaye,shrilankaa me 44 purush aur 16 mahilaaye,swatzarland me 26 purush aur 10 mahilaaye,amerikaa me 18purush aur 5 mahilaaye, chinaa me 13 purush aur 14 mahilaaye,bhaarat me cum se cum aakadaa hai 12 purush aur 9 mahilaaye..

abhi bhi bhaarat un ka swaami hai, guru hai ki abhi bhi itani aatmhatyaaye nahi hoti  jitani aur desho me hoti hai…to ye yash jaataa hai sant aur samaaj ke bich setu banaane waale samiti ke jholi me!ye yash hai bhakt aur mandalo ke jholi me…

mandir aur upaasanaa gruh jin ke suhaavate nahi un bewkufo ko samajhanaa chaahiye ki mandir aur upaasanaa gruh  mitaate jaayenge to aatm-hatyaaye badhati jaayegi,rog badhate jaayenge…jhuth,kapat,fareb badhate jaayenge ..

vikasit desh 13laakh 50hajaar kanyaao ko school jaate jaate garbhvati kar dete hai… apane desh ko shradhdda raheet, darshan raheet banaakar kaunsi khaayi me le jaate ho?

kisi kaa paisaa chhinanaa paap hai, kisi kaa haath pair todanaa paap hai, gunaah hai.. kisi kaa sir phod denaa, jaan le lenaa ye badaa gunaah hai lekin is se bhi  khatarnaak gunaah hai manushy jaati se shradhdaa aur satsang chhinane kaa ku-prachaar karanaa!

ek report ke anusaar amerikaa me ek saal me 1lakh 68 hajaar bade aparaadh hote… 10 hajaar naagrik ke pichhe 1 khun hotaa, kul 228 hinsak aparaadh hote… 22 lute aur 7 balaatkaar, 43 jaanlewaa maarkaat hoti, 155 saadhaaran maarkaate hoti hai …

itnaa hinsak aparaadh hote hai vikasit amerikaa me..

agar tatvgyaan aur shradhdaa nahi hai, sant samaaj se dur kar diyaa jaaye to vo dayniya sthiti humhaari hone lagegi..wahaa paisaa hai, gaadiyaa hai ,sab kuchh hai..humhaare se saade 3 gunaa jyaadaa wahaa ki bhumi hai, aur humhaare se tisaraa hissaa public hai..aur suvidhaaye to hum se saade 9 gunaa jyaadaa hai..tab bhi humhaari apekshaa ve log jyaadaa dukhi hai..kyo ?

kyo ki shradhdaa nahi, darshan nahi, bhaaratiy sanskruti kaa paraspar bhaav-yanto nahi hai..

to apane jeevan ko purn banaanaa hai to  in sidhddaanto ko aatmsaat karanaa hi hogaa…jitanaa aatmsaat karenge utane aap aur aap ke sampark me aanewaale aur deshwaasi aur videsh waasi unnat rahenge …sukhi rahenge..

sukhi rahene ke sutr hai ki aap ke jeevan me ye sadgun laao:-

1) praanimaatr me darshan ke  bal se apane tatv ko, apane isht ko,apane aapaa ko dekho to aap kaa raag ,dwesh, bhay , shok, irshaa, chintaa yun bhaagegi jaise suraj aate hi andheraa bhaag jaataa hai..

2)vidhi ke haath se jo kuchh ghatataa hai us me sam rahene kaa gun le aao.. aap kaa chitt santulit rahegaa aur budhdi dukh-sukh ke sir par pair rakhanewaali banegi…

3)tisaraa sadgun laao aap ke jeevan me ki adhik apekshaaye rakhane ki galati nikaalo.. mai sat-chit-aanand amar paramaatmaa kaa sanaatan saput hun, in chijo ke baad bhi log sukhi nahi hai, mai apane aap me sukhi rahenaa jaanataa hun..

apekshaaye cum kar ke,bahirmukhataa cum kar ke ,waani kaa aur bhogo kaa sanyam kar ke apane aap me sukhi rahenaa sikhu  to aap unnat ho jaaoge..

4)chauthaa gun hai kisi ne madat ki to us ko bhulo mat, aap ne kisi ko kuchh diyaa to yaad karo nahi ..agar aap ne kisi par upkaar kiyaa hai to aap ko prasannataa aur udaarataa milegi aur aur dusaro ne aap par upkaar kiyaa hai to us ko bhuule nahi to saamanewaale ke prem paatr rahoge…hum galati ye karate ki hum ne dusaro ko madat kiyaa to gaate phirate hai..aur dusare se liye to chhupate; is se dukh aur a-maanavataa badhati hai..kisi ne madat kee to us ko dhanyawaad do,aur aap ne kisi ko madat kiyaa to audaary kaa sukh, prasannataa ko badhaayegaa…

5)heen bhaav se kataaksh ki bhaashaa kisi ke liye mat bolo…chhote se chhotaa,heen se heen vyakti bhi bhitar se paramaatmaa  kaa amrutputr hai…saty bolo lekin kathor mat bolo..saty bolo,lekinheetkar bolo, madhur bolo..aap in sadguno se sajj kar lo apane aap ko…

par-charchaa nahi kare..is se asantulan hotaa hai..kisi vyakti ke saamane us ki baat nahi kar sakate to us ki gair haajiri me us bechaare baat kar ke us ko nichaa dikhaane kaa uddesh naa karo…is se aap kaa hruday swachh rahegaa… aap ke hruday me sab ke liye sad-bhaav ho, prem-bhaav aur apanatv kaa bhaav ho to jhute aarop lagaanewaale ke hruday me bhi der-saber sachchaayi ko samajh kar aap ke prati sadbhaav se sampann honge…vo ho chaahe naa ho,lekin ishwar to aap se sadbhaav se sampann hai aur rahenge…

6) kisi ki gupt baat pragat karane se us ko haani hoti ho to us ki gupt baat pragat naa kare..sab ke saamane nahi,apitu akele me samjhaao ki bhaiyaa ,betaa ye mere ko aisaa aisaa lagataa hai…ye dosh aap me nahi lekin aap ke man me logo ko dosh dikhate to aap krupaa kare,in dosho ko kuchalo…to vo aap kaa mitr banegaa…aur is me ye dosh hai aisaa sab ke saamane pragat karoge to vo aap kaa shatru banegaa aur aap apane aap ke shatru banoge kyo ki aap ke hruday me hilchaal ho jaayegi…

7) apani aawashyakataa cum se cum rakho..apanaa kaam aap kar sako to utanaa achhaa hai..

mujhe yaad hai, mere gurudev aagraa me padhaare the…mai darshan karane un ke charano me gayaa thaa..gurudev ne snaan kiyaa…dhule vastra pahene aur  satshaashtr padhane me lage.. maine dekhaa ki gurudev ke utaare huye vastr pade the..maine baalati me paani liyaa,vastra duboye ki dhokar sukhaanaa chaahaa..itane me gurudev ki drushti padi.. “AE!kyaa karataa hai!!” bahot jor se daant padi.. “mere ko haath nahi hai kyaa?”

haalaaki  meraa kartavy thaa aur un kaa adhikaar thaa…lekin unho ne snaan kar ke apane vastr swayam hi nichodane kaa niyam rakhaa thaa..

maine guruji ke vastr nichodane chaahe to mere ko hi nichod daalaa guruji ki daant ne!lekin vo daant mereliye kitani heetkaari hai ki abhi bhi mai mere vastra ko khud hi nichodataa!agar vo daant nahi padati to mai bhi aaraam priy ho jaataa!!kyaa us devataa ki daant ne meraa kalyaan kiyaa hai!! mere guru devataa ke charano me to laakh laakh pranaam hai..un ki daant ko bhi lakah laakh pranaam hai!!!!!

86 saal ke bhagavaan the mere prabhuji..jaise shaivbhakto ko shiv tatv sarv vyaapaak lagataa hai..aise  sadguru bhakto ko sadguru tatv ko sarv vyaapak maanate..

muktaanand kahete the ki mere nityaanand gurudev sarv vyaapak vibhu hai,  chinmay hai…sury,chandr aur anant aakaash gangaa mere nityaanand guruji me hai..

aise hi mere lilaashaah guruji bhi nitya aanand me hai,ye prakruti jahaa se leelaaye kar rahi,jahaa se leelaa karane ki sattaa aati hai usi me pratishtit hai…

aise sadguru kaa darshan aur aise sadguru ki sewaa to hum ne kyaa kiyaa?maine to bahot sewaa karane ke liye ajiji kiyaa..to bole, “sewaa karegaa?”

bolaa, “haa”

man me sochaa ki guruji jo bhi kahenge sabkuchh arpan kar denge…aur ye sabkuchh nashwar ve kyaa maange?

“bataau sewaa? karegaa?”

“ji”

bole, “aatmsakshaakaar kar le aur dusaro ko ye prasaad baatataa rahe!”

to aaj tuk  un kaa hi sankalp kaam kar rahaa …nahi to mai apane bal se kya abaatataa hun? 🙂

kahe naanak sab teri vadiyaayi

laakho laakho aadami aise ghanto tuk baithe rahete is me meraa kalaa kushalataa kaarigiri hai kyaa? jinho ne kahaa wo hi karavaa rahe!

naaraayan hari! Naaraayan hari!

teraa tujh ko det hai,

kyaa laagat hai mor?

hum galati karate ki diyaa to us daataa ne hai,hum apani mohar lagaate to phir raavan ke raaste ki yaatraa shuru ho jati hai..khud karane kaa kartaapan paalate to parichhinn ho jaate, bojaa ban jaataa hai, thakaan ho jaati hai..

raamaayan kaa prasang hai…Ram ji bolate, “hanumaanji, raavan ke baare me jo bhi karate vichar ke karate… puchh ke karate.. anguthi kahaa phenkana kaise kyaa karanaa.. tappe tappe pe meri preranaa lete..aur itani saari lankaa jalaa di tum ne… ye kyaa kiyaa?”

sawaal hai naa?

hanumaan ji ram ji ke saamane nischint khade!….bole, “ye kyaa kiyaa to…. mujhe karanaa hotaa to mujhe puchhanaa chaahiye thaa….lekin jis ne jo jaisaa  karavaayaa…jaisi saamugri bhijvaayaa…jaisaa waataavaran kiyaa aur jaise lankaa jalvaayaa…is me mai to haath jodataa hun..”

Raam ji ne dekhaa ki,Hanumaanji me  kartrutv kaa bojaa nahi…raag se nahi kiyaa, dwesh se nahi kiyaa, niyati se karavaayaa gayaa hai…isi liye aaj bhi bolate ki,

raamlakshman jaanaki! jay bolo hanumaanji!!

koyi phauji border pe dushman ko dher karataa to bahaaduri kaa medal milegaa,lekin sivil me kisi ko maargeaa to case ban jaayegaa.. aise hi aap apane raag dwesh se prerit ho kar karate to aap kaa karm bandhan me aate hai…..lekin darshan, shradhdaa,udaarataa , hruday kaa saundary nirvikaaritaa se aap rahete to aap se sab karm karavaaye jaate! jab karvaaye jaate to

jaisaa amrut taisi biskaathi..

jaisa maan taisaa apamaanaa

harsh shok jaa ke nahi

vairi meet samaan

kahe naanak sun re manaa

muktataa taahi ke jaan

aap muktaatmaa ho gaye!bramhgyaani ho gaye.. apane karm aap apane sukh ke liye, badappan ke liye karate to karm-bandhan me aate hai..sipaahi apane raag dwesh se kisi ko maarataa to karam bandhan me aataa hai…apane raag se kisi ko de detaa to chori me aataa hai..lekin order hogaa ki ye de do to sipaahi nischint hogaa ….aise hi aap niyati aur niyati ke adhisthaan ke saath apane ‘mai’ ko milaate to karane kaa bojaa nahi hogaa..aap ke dwaaraa aap kalpanaa nahi kar sakate utane bade bade kaam honge lekin karane kaa boja anahi hogaa… saphalataa-viphalataa kaa vikalp aur bhay nahi hogaa…

OM SHAANTI.

SADGURUDEV JI BHAGAVAAN KI JAY HO!!!!!

(Galatiyo ke liye Prabhuji kshamaa kare…)

Advertisements
Explore posts in the same categories: Pujya Bapuji

One Comment on “Jeevan me Purnataa Laao”

  1. shrikant pandey Says:

    Thanks for satsang amrit

    Hariom


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: